كيف مـنـعالـج تـراجـع اللـثة
مثل موعدناكن بالبوست السابق رح نحكي بتفاصيل علاج الانحسار اللثوي …
في حال انحسار اللثة الخفيف هنا سيقوم طبيب الأسنان ب :
التنظيف والتجريف العميق للمنطقة المصابة بالتقليح وتسوية الجذور حيث يتم إزالة كل ما علق على سطح السن والجذر أسفل خط اللثة من جراثيم ولويحة وقلح و تنعيم المنطقة جيداً لمنع التصاق البكتيريا عليها
وصف الصادات الحيوية في حال لزومها للتخلص من الجراثيم المتبقية
إذا تعذر علاج تراجع اللثة بالطريقة السابقة بسبب الفقد الزائد للعظام وتكوٌن الجيوب العميقة ، فهون ممكن يحتاج المريض لعملية جراحية في اللثة لإصلاح الضرر الناجم ..
طيب شو أنواع الجراحات المستخدمة للعلاج ( تحتاج أخصائي لثة)
التجريف المفتوح ؛ هوي نفس العلاج أو العملية السابقة اللي هيي التنظيف بس هالمرة مع شق جراحي لنقدر نوصل للمناطق المصابة أكثر
التجديد ؛ هون الآلية يلي بتصير إنه منحط مادة متجددة مثل غشاء أو نسيج من نسج التطعيم أو حتى بروتين محفّز للأنسجة بحيث يحفّز على تجديد العظم والأنسجة بالمنطقة المصابة
الطعوم اللثوية (طعوم النسج الرخوة) يلي إلها عدة أنواع كالتالي :
طعم النسيج الضام ؛ وهون مناخذ شوي من نسيج سقف الحلق ومنزيل طبقة الأنسجة الضامة تحت الظهارة من أسفل هالطعم وبتّم خياطتو مع أنسجة اللثة المحيطة بجذر السن المكشوف
الطعم اللثوي الحر ؛ هون مناخذ شوي من نسيج سقف الحلق بس بدون مَنشيل الطبقة تحت الجلد مثل الطعم يلي قبله ، ومنخيّطها لعند المكان المصاب
وأحياناً في حال عنا نسج جيدة كافية بجانب السن يلي لثته منحسرة منقدر نطعم اللثة من الجانب للسن بدون إزالة نسج من سقف الحلق ؛ والطريقة بتتسمى الطعم المعنق أو المذنب
وهيك هلق اتعرفنا عالعلاج ؛ شو عندكن استفسارات حطولنا ياها بالتعليقات لنرجعلكن ببوست جديد عن الوقاية من انحسار اللثة …
منّـي ومن الميـددوز كل الحب والسلام
– إعـداد : د . مـاسـة أكـرم نعـيم
– المصـدر الـعلمي : Receding Gums Webmd
” رابط المصدر بالتعليقات ”
منظمـة مـيددوز ~ مصـدرك الموثـوق للمعلومـة الطبيـة
منصة صحة الفم السورية
مواضيع صحة الاسنان والفم