للتسلية (( تحدي الكتروني بين الكذابين )) اثنان يعمل

للتسلية..
((** تحدي الكتروني بين الكذابين ** ))
.
اثنان يعملان بالالكترونيات و بدأ بينهما تحدي في الكذب على المصلحة ..تعالوا لنشاهد هذا التحدي المسلي.
.
أبو عنتر : أنا بزماني جاءني راديو فكه مصلح قبلي و مضيع الإذاعات ، قمت ركبتله شوية اذاعات أصلية اشتريتهم من عالبسطة باليابان.
أبو فهمي : من عالبسطة باليابان ؟
طيب أنا اجاني تلفزيون مكسور من طرفه و هربان منه مذيع النشرة الجوية ، حكيت مع بنت الجيران و دخلتها بالتلفزيون لتذيع النشرة بداله.
أبو عنتر : بالله… كيف اندحشت معك؟
أبو فهمي : هاد شغلي حبيبي..
أبو عنتر : إي أنا بزمانه اجاني كرت شاشة كمبيوتر فلتان مبرّد المعالج… قمت ثقبت المبرد مع المعالج من النص، و ثبتتهم ببرغي و عزقة ..
أبو فهمي : و ما انضرب ؟
أبو عنتر : لأ ما انضرب ..ليكه شغّال متل الليرة.
أبو فهمي : إي أنا بزماني اجاني معالج بينيتيوم 4 عاطل ، فتحته لقيت فيه 50 مليون ترانزستور ، و فيهم واحد عاطل ، كحته بالمفك و ركبت بداله BC337.
أبو عنتر : يا باطل… و اشتغل معك ؟
أبو فهمي : اي اشتغل حبيبي ..اشتغل.
أبو عنتر : ووين حطيته للترانزستور ؟
أبو فهمي : ثقبتله 3 ثقوب بالغلاف و طلعته لبرا عيوني.
أبو عنتر: إي أنا بزماني اجاني واحد ياباني حامل معه بورد التحكم لمفاعل فوكوشيما و عطلان… فتحته لقيت بقلبه مي من الفيضان… نشفته بالسشوار و نضفته بالبنزين ..و راح ركبه و اشتغل متل الليرة.
أبو فهمي : مفاعل فوكوشيما ؟
إي أنا بزماني جابولي بورد التحكم لطيارة بوينغ 737 و عطلان بدهم يصلحوه ، فتحته طلعلي منه صراصير ، و في صرصور مشورط كريستالة المعالج ، رشيته بفباف و شلته، و رجع اشتغل مباشرة عيوني ..
أبو عنتر : إي أنا بزمانه أخدوني عالفضاء لصلّح قمر صناعي… و هنيك لقيت القمر الصناعي عم يعطي E0، فبدلت المكثف و ترانزستور موسفيت ، بس طلع الترانزستور مو أصلي و رجع ضرب ، قمت بعتتهم بالمكوك الفضائي عالأرض جابولي ترانزستور أصلي و ركبته و اشتغل تمام ..
أبو فهمي : و لي على هالخرطة….
احتار أبو فهمي ..ثم قال:
إي أنا بزماني أخدوني لصلّح مكوك الفضاء تشالنجر ، و وقتها قلي مدير وكالة ناسا قبل ما اشتغل: بيكون مضروب فيه شي فيوز… قمت زعلت و قلتله هي فيوز روح ركبه لحالك و تركتهم…
بالظاهر ركب فيوز من عنده و لما طلع المكوك بالفضاء انفجر و ماتوا الرواد السبعة من حيونته.
أبو عنتر : و ليش ما صلحته و خورفتهم ؟
أبو فهمي : إذا من أولها عم يقلي فيوز مشان ما آخد أجرة كبيرة… كيف بدي خورفهم حبيبي ؟
أبو عنتر: أنا لو كنت محلك كنت فرطت المكوك و رحت و جيت شهرين لعنده مشان دفعهم أجرة مستاهلة…
أبو فهمي : شو شايفني نصاب متلك عيوني .
أبو عنتر : إي أنا بزمانه جابولي آلة حاسبة عطلانة ..عدلتها و ضفتلها ميزة لتحسب اليوم آخر يوم بعمرك
و طلع المسدس و بلش طخ على أبو فهمي .
أبو فهمي هرب بسرعة و راح لزاوية الحارة و صرخ : هيك يا أبو الشباب ..هيك… روح إن شاء الله يخرب موبايلك و تدور تدور ما تلاقي غيري يصلحلك اياه ، و تطلع مشكلته فلتانة فلاتة البطارية…
أبو عنتر : اي برميه بالزبالة و ما بجيبه لعندك… روح الله يلعنك واحد ثرثري كذاب… ليكك من فرد كبسون هربت ..تضرب من بين الرجال… باطل.
و انتهت الحلقة.