نصيحة
لما تقابلك مشكلة في الكود بتاعك، طلعلك Error ما وانت مش قادر تحدد المشكلة فين، بلاش تبقى أول خطوة تعملها هي إنك تنسخ الكود بتاعك وتحطه على Stack overflow أو GitHub أو حتى تسأل في أحد جروبات البرمجة، خلي دايمًا دي أخر خطوة
في البداية إعمل Debugging للكود بتاعك، شوف أنهي سطر بالظبط بيطلع الـError ده، شوف إيه الداتا اللي بيتعامل معاها السطر ده والـFlow مشي إزاي لحد ما وصلنا للسطر ده!
على سبيل المثال، لقيت الـError جايلك في سطر إنت مستخدم فيه Function من الـBuilt-in Functions اللي في اللغة، هنا ببساطة هتشوف الـParams اللي انت مديها للـFunction دي سليمة ولا لأ، خش شوف الـDocs واقرأ عنها بشكل مستفيض
لسة المشكلة ماتحلتش؟
إبدأ هنا تبحث عن حد واجه المشكلة دي قبل كدة، شوف الـCase بتاعته كانت إيه والناس حليتها إزاي، ماتخدش الكود كوبي بيست، حاول تكتبه هو هو بس بإيدك.
لسة المشكلة ماتحلتش؟
هنا إنت استفدت كمية معلومات ضخمة من البحث البسيط ده، دلوقتي بقى عندك توصيف كويس للمشكلة بتاعتك، وممكن تسأل دلوقتي على أي مجتمع من اللي جيبنا سيرتهم فوق، يستحسن جدًا بقى في السؤال بتاعك ترفق الجزء المهم بس من الكود، توضح المشكلة بتاعتك بالتفصيل، توضح الـBehavior اللي انت منتظره والـBehavior اللي طلعلك بالفعل، وتوضح برضه النقط اللي وصلتلها من البحث
كل ده هيساعدك إنت الأول تصيغ المعلومة بشكل سليم، ممكن كمان وإنت بتكتب السؤال تلاقي الإجابة جت في دماغك من مجرد تنظيم حبل أفكارك بالشكل ده! وكمان هتسهل ع اللي هيساعدك وتوفر عليك وعليه الوقت في محاولة الوصول للحل.
في النهاية أنا عارف إن الوقت مش هيكون عامل مساعد في جميع الأحوال، ولكن خلي الطريقة دي هي الـDefault بتاعتك، واحدة واحدة هتلاقي نفسك بتقدر تحدد المشاكل بسهولة ومن مجرد النظر!
دي كانت Tip من اللي اتعلمتها بصعوبة، وحقيقي فرقت معايا جدًا ونقلت مستوايا من حد مقتنع تمامًا بـit works, don’t touch، لحد تاني بيسأل دي إشتغلت ليه وإزاي
وشتان ما بيني في الحالتين.
الجينيص
الجينيص