ماما حبيبي أنتِ سمعانة بوضعية غلندايزر ؟ عرفانة مدى أهميته

👶🏻 ماما حبيبي أنتِ سمعانة بوضعية غلندايزر ؟ عرفانة مدى أهميتها وقيمتها الثمينة بتقوية عضلاتي وتدريبي لكون سوبر مان حقيقي 🦸
اسمها بالطب tummy time وفيها أنا بنام على كرشي وبرفع راسي وأيديي ورجليي وبطييير 😂

👶🏻 ما تقعدي تجربيها فيي وأنا عمري أقل من شهر 🥴 ما بهالعمر يا دوب يكون عندك بيبي وأنا يا دوب يكون عندي بطن لنام عليه 🥱

منعملها من الشهر الأول للتالت حتى تساعدني دحبي وأمشي وأقعد .. بتقوي هي الحركة الطائرة العضلات اللازمة لهالمهارات الضرورية للتنكيش والتخريب ❤️

ومن عمر ال7 شهور لل9 شهور صح بصير بقدر أقعد وأتدحكل يعني أتدحرج بمساعدة أو بدونها بس مع هيك ما زلنا صغاراً وما زلنا بحاجة إشرافك وهون بتصير هالحركة رياضة كمال أجسام لنعمل ضهر وبطن أقوياء 💪🏻

👶🏻 وقت بكون برحمك الحنون بيبقى أحياناً المكان ضيق وأنا حرك وخلقي ضيق فرقبتي بتنحصر وبولد وفيها ضعف ما بقدر حركها متل ما بدي يعني بتبين كأنها مايلة أو مشكولة وهالحالة اسمها الصعر .. شو الها علاقة لهي بموضوعنا ؟
الحركة هي بتساعدني أتطلع عاللي حواليي بشكل أسهل وبترخيلي هالرقبة المشدودة .

👶🏻 ممكن كون تنح وأتنح منك وكل ما نمت على ضهري وراسي مسطح تجي تميليلي ياه وارجع اقلبو مسطح هييك ليصير عندي عنجد راس مسطحة وتنحفر بقعة بنص قرعتي 😂💔 هي الحركة بتساعدك على مقاومة عنادي وتناحي الحمدلله 🥲

👶🏻 وهلق منجي لنعلمك كيف تعمليها يا ماما ♥️

لو كنت لساتني بيبي صغير وقد الفستوك بتنيمني على بطني على صدرك أو بحضنك كم دقيقة ما تطولي مرتين ل3 مرات باليوم ومع الوقت بتزيدي وقت القعدة .

بعمر أكبر بتقعديني عبطانية عالأرض 3ل5 دقايق وكمان بتزيد المدة مع الوقت وهون بدي منك توقفي قدامي وتخشخشيلي لفوق لطلع عليكي وارفع رقبتي يعني حضرتك الكوتش بدك تقودينا 🤭

بيوصوكي الخبراء أنو لازم أقعد تقريب الساعة على بطني بس يصير عمري 3 شهور فأنت وشطارتك كوتش .. مو شطارتك بالتدريب ، شطارتك بترباية عنادي 😂

👶🏻 المهم انتبهي اعملك غليندايزر وأنا نايم .. منكون بطيران منصير بموت مفاجئ
ما تحطيني عتخت أو عمخدة وشرشف ناعم .. روح قلبي اختنق لأنو 😂
ضلي معي وأنا عامل هالوضعية الخارقة وكل ما حسيتيني مليت واتململت قللي المدة ولهيني ومتل كل مرة نسيني متل الأجدب ليش عم أبكي 🙂

بحبك ويلا نطييير ❤️

كنت معكم سَماح صالح محمد ❤️

(سماعة حكيم)