ما بدي الببرونة ما بدي ، بطني عم يوجعني وكل ما باكل بنزعج م

👶🏻 ما بدي الببرونة ما بدي ، بطني عم يوجعني وكل ما باكل بنزعج مو معقول أنو عملة الببي بدها كل هالجهد والتعب 😣
تانياً مزعوج منك وزعلان كيف بتصير ملامح وجهك بس تفتحي حفوضتي وتصرخي “يووووه شو هالريحة وهالمنظر”
وفوق هاد كلو بدل ما تاخديني على دكتور بتروحي بتسألي جارتك وبتخرف هديك حكي من عندا 😒

👶🏻 حرصاً مني على صحتي وراحتي وراحة الحفوضة رح أشرحلك يلي عم يصير معي يا ماما وأعطيكِ الحلول والتوصيات 🧘
بالطبيعي أنا حديث ولادة وأكلي لازم يكون من صدرك يعني رضاعة طبيعية وبهالحالة برازي بكون رخو وسائل وعدد مرات الببي بتختلف بين طفل والتاني ممكن تكون كل يوم وممكن بالأسبوع مرة مرتين وهاد طبيعي 👍🏻 وطبيعي كمان تشوفيني عم أتعصور شوي أو عم أبكي بس أعمل الببي .

👶🏻 أنا انحرمت من هالشي يا ماما بسبب مرضي وصرت أرضع حليب صناعي وهون الطبيعي يكون برازي صلب وحركات أمعائي قليلة وكون معرض أكتر من غيري ليصير معي إمساك .

👶🏻 ما فيكي تتأكدي أني مكتم من مجرد عصورة وانزعاج وقت التبرز متل ما قلتلك .. لازم يكون برازي مبين كيف صلب جاف ومفتت إضافةً لكل الأعراض يلي حكيتلك ياها بالبداية أنها عم تصير معي 💔
ممكن تشوفي دم بحفوضتي ؟
اي ممكن ولا تخافي هي من تشقق فتحة الشرج بسبب قساوة البراز .

👶🏻 السبب غالباً أني ما عم أخد سوائل بما يكفي ولأنو الرضاعة الطبيعية معباية مي لهيك نادر يصير فيها إمساك بس الحليب الصناعي وبوقت تدخيل الأكل كتير ممكن يصير لهيك نيالو يلي بيرضع طبيعي يا ماما نيالو نعمة 🥺

👶🏻 توصياتي الك بما أنك عم تطعميني حليب صناعي تنتبهي لطريقة عمل الببرونة لازم تكوني دقيقة بالعيارات وتستخدمي الملعقة تبع العلبة وتنتبهي تحطي المي بعدين البودرة مو العكس وتعطي كمية المي الموصى فيها بالتعليمات عالليبرة .

التوصيات للي عم ترضع طبيعي أنها تضل عم ترضع وتزيد الرضعات مو أكتر ..

وكل الماميات بتقدروا تريحونا لو عملتولنا حمام دافي أو فركتولنا بطوننا بحنية أو لعبتولنا رجلينا لعبة البسكليتة بس أوعكن تجربوا تعطوا أي دوا بدون مشورة دكتور أوعى 🤫

👶🏻 أنتِ هلق ضروري تاخديني عدكتور بما أنو عندي صفات البراز بحالة الإمساك وشايفتيني كيف متألم ومزعوج .. لو لاحظتي خف أكلي ووزني أو شفتي دم بالحفوضة كمان هدول بيخبروكي أنو لازم تاخديني 🥲

👶🏻 أبو الإمساك يا ماما ما أصعبو بس تحسي حالك كل ما بدك تريحي ضميرك يوجعك هوي وغيرو وزيادة .. سامحينا عالسيرة اللي بتقرف بس وجوب التوعية يا قلبي وبدنا نرتاح تعبنا اي والله تعبنا 💔

كنت معكم سَماح صالح محمد ♥️

كان يا مكان الطب 💙

(سماعة حكيم)