ما كنت بعرف أنو حتى جسمي عم يأدي مهمة الأمومة معك على أكمل

🤰 ما كنت بعرف أنو حتى جسمي عم يأدي مهمة الأمومة معك على أكمل وجه يا ماما ❤️ صرنا بالشهر الرابع وصرت بحاجة لضخ دم أكبر حتى يغذيك ولهالسبب أوردة جسمي رح تحتقن لهيك ممكن أنفي يسكر وممكن يصير في دوالي برجليي ..

🤰 أنت هلق كبرت صرت قد حبة الأفوكادو وصار فيك تشط وتمط حالك لتضغط عمعدتي وتعملي حرقة وتضغط على أمعائي وتعملي إمساك وتضغط على صدري ليضيق نفسي 😓

🤰 الحقيقة الحلوة بهالشهر أنو أدنيك وعيونك اكتمل تكوينن فصرت قادرة أنا والبابا نغنيلك ونحاكيك .. صار فيي خبرك قديه بحبك وقديه مشتاقة لشوفتك يا صغيوري 🥰

🤰 رح نروح عالدكتورة لنعرف جنسك لأنو هلق أعضائك التناسلية بتبلش تبين 😍 في شي تاني تفاجئنا أنا وأبوك وقت شفناه حزور شو هوي ؟
كرشك 😂 والله يا حبيبي كرشك طلع بالإيكو شكلك طالع لأمك بتحب الأكل ولأبوك ببين عليك الأكل 🤭
قالتلنا الدكتورة أنو بما أنك البكر والحمل الأول مو ضروري يبين بطونك بس أنت بينت ❤️

🤰 وأخيراً صرت حس بنفضاتك وعم أشعر بين الفترة والفترة أنك عم تنطوط .. يلي عرفتو أنو عادي حسب مكانك بالرحم بحس بحركتك وشقاوتك أو لاء ، يعني يمكن أنت قاعد هلق عم ترقص بس مبعد عن جدار الرحم فما بحس فيك 😭
على كل حال خبرتني الدكتورة أنو إحداثيات رفساتك هيي مثانتي والي الله 😂❤️

🤰 رغم وجع الضهر وحرقة المعدة وضيق النفس والإمساك والشهية المفتوحة والوزن يلي كل مانو عم يزيد أنا كتير بحبك وكتير مشتاقة شوفك ولا تتخيل في أحلى من هالوقت يلي عم قضيه وأنت مني وفيي ❤️ جواتي عم أنبض بقلبي وقلبك وعم عيش بروحي وروحك ❤️

بحبك يا ماما ♥️

كنت معكم سَماح صالح محمد ♥️

(سماعة حكيم)