ماحدا طلب رأيك كمان مرة
ومع ذلك رح نعطي رأينا
تاني ضيف معنا هوي
المنظم الشمسي PWM
أو متحكم الشحن الشمسي PWM بعبارة أخرى
هوي جهاز إلكتروني، دخلو من اللوح الشمسي
وخرجو عالبطارية، ليشحنها
والو خرج تاني مخصص لتاخد تغذية الأحمال منو، بمعنى مابقا تربط عالبطارية شي، وخود التغذية من الخرج التاني
طب ليش؟
لأنو هاد المخرج بيحمي البطارية من التفريغ الجائر للبطارية
ميزات المتحكم:
-رخيص الثمن نسبياً
-رخيص الثمن نسبياً مرة تانية
-رخيص الثمن نسبيا، كمان مرة
السلبياتوما أكثرها..
-أكبر سلبية بهالمتحكم مشروحة باسم المتحكم، اي متل ماعم قلك، هاد متحكم PWM
Pulse Width Modulation
تعديل عرض النبضة بالعربي
في معالج ضمن المتحكم، بيقيس جهد اللوح، بيقيس جهد البطارية، وقادر يتحكم ب سويتش بيوصل اللوح مع البطارية، تعوا هلق نناقش الحالات التالية:
جهد اللوح ١٨ فولط وجهد البطارية ١٢ فولط
بيقوم المتحكم خلال دورة زمنية واحدة بوصل السويتش ٦٧ بالمية وبيطفيه ٣٣ بالمية وهيك بيمرر تيار للبطارية، طبعا بمعزل عن الضياعات بالسويتش، ضاعت طاقة معتبرة من اللوح رح ننطرقلها لاحقا
تاني حالة
اللوح ١٠ فولط، البطارية ١٢ فولط
مابيصير شي، مافي أي تيار شحن
طبعا بيتم تحديد نسبة وصل السويتش لفصل السويتش بناء ع جهد اللوح وجهد البطارية
والزبدة؟
ليش مو منيح هالمتحكم؟
ايوااا، هاد اللوح بيضيع طاقة، التيار اللي مابيشحن البطارية انت ماعم تستفاد منو
يعني اذا اللوح عندك جهدو الاسمي ٥٥ فولط وتيارو ١٠ أمبير
وبطاريتك ١٢ فولط جهدها الاسمي
وربطتهم على متحكم PWM، اي شو بيصير؟
مش، بتشحن البطارية بتيار اقصاه ١٠ أمبير، يعني لوح ال ٥٥٠ واط، صار لوح ١٢٠ واط
طب ليش موجود هالاختراع من الاساس؟!
لانو رخيص
مناسب للالواح اللي جهدها الاسمي تحت ال ٢١ فولط والمنظومات الصغيرة، يعني شغلة ليد راوتر ويمكن لابتوب
والبديل؟
اذا منظومتك أكبر، ركب متحكم MPPT وهاد رح نحكي عنو اذا مش هلق يوماً ما
ملاحظة: صح بيشتغل علوح جهدو ٥٥ فولط بس لاااااتوصلو ع هيك لوح، جيب لوح أصغر وأرخص بكتير
سايبرترون سايبرفيو ماحدا طلب رأيك
