مواعيد بزوغ أسنان الأطفال بتختلف من شخص لآخر

🚩 يااا دكتور لحقني…
ابني صار عمرو 10 شهور ولهلق ما طلع ولا سن بتمو و أخوه الكبير بعمر ال6-7 شهور كان طالعلو سنين تحت ف شو القصة😭 ؟!

غالباً منسمع هالسؤال وبيجوا الأهل خايفين جداً انو ممكن يكون في مشكلة بأسنان الطفل…!!

⛔و لأن الميددوز دائماً معكم رح نزيل كل المخاوف و علامات الاستفهام بهل الموضوع…

⚠️ عادةً الطفل بيخلق مع أغلب أسنانه مكوّنة وجاهزة مسبقاً ومخباية باللثة…

⚠️ بتبدأ أول الأسنان بالظهور (البزوغ) بعمر ال6 أشهر (وهي القواطع السفلية المركزية “الثنايا” وبعدين بتلحقها القواطع الأربعة العلوية بعمر ال10 أشهر)…

⛔يعني دكتور هي المواعيد ثابتة لظهور الأسنان!؟
واذا تأخر ابني عن ال6 أشهر لازم اخد استشارة طبية ⁉️

⚠️ حقيقةً لاء لانو مواعيد بزوغ أسنان الأطفال بتختلف من شخص لآخر…

⚠️ لهيك منحدد نحن الفترة الطبيعية لظهور أول سن بمجال وليس توقيت محدد والمجال لظهور أول سن هو بين 6-9 أشهر وفي حال عدم ظهور أول سن بعد عمر ال9 أشهر ينصح بأخذ الاستشارة الطبية…

⚠️ علماً انو مو ضروري يكون الأمر خطير لانو بعض الأطفال بيتأخر البزوع عندن لعمر ال15 شهر😯😯!!

⛔طيب شو الي ممكن يخلي أسنان ابني تتأخر بالظهور ⁉️
عدة أسباب منها :

⚠️ أسباب جينية : بعض الاضطرابات الجينية مثل متلازمة داون او متلازمة آبرت بالاضافة لبعض الشذوذات الجينية ممكن تخلي الأسنان ضعيفة او مشوهة او بالأساس غير موجودة يعني الطفل ما بيظهر عندو ولا سن 😓😓 !!

⚠️ اضطرابات تطورية : مثل قصور الغدة النخامية والغدة الدرقية.

⚠️ نقص او سوء تغذية : نقص الفيتامينات خاصةً ممكن يأخر بظهور الأسنان وايضا بتعمللنا أسنان هشة…

⚠️ الولادة المبكرة أو الوزن المنخفض عند الولادة، ممكن يسببو تأخر بالظهور او مشاكل بالميناء تبع الأسنان .

‼️ لهيك لازم نحافظ على صحة طفلنا العامة ونهتم بغذائه و لما نشعر بالقلق ما نتردد بطلب الاستشارة الطبية.

● إعداد وتحرير : د. أيسر أبو فخر
● المصدر العلمي :https://bit.ly/3bL6b72

🚩 اعـتمادُ ” مِنصَّـةِ صِحـَّةِ الـفَم السوريَّـة – MedDose ”
المتخصِّصةُ بنشر الموثوقِ من طبّ الأسنـان و اختصاصاتهِ ومُحاربةِ المُعتقداتِ الطبيـَّة الخاطئـة .

مواضيع صحة الاسنان والفم