هاد السن لازمو تلبيسة ، أو تاج

🚩 هاد السن لازمو تلبيسة ، أو تاج

أكيد أغلبنا سمعنا هالعبارة من دكاترة الأسنان 👩‍⚕️…

وبلشت الأسئلة تدور بمخنا، عن سبب تلبيس الأسنان، وخطوات هالمعالجة ❗❗

الميددوز اليوم .. حتجيب عيادة الأسنان لعندك 😁 وحتجاوب عكل تساؤلاتك بما يخص هالموضوع..

⭕ شو هي التيجان السنية ؟
هي تعويضات ثابتة، بتعوض عن سنك التالف بسبب النخر أو الكسر.. يعني بالمختصر عم تحافظ على الجزء المتبقي من سنك، وتحمي الحيوية الموجودة باللب.

⭕بتاخذ شكل القبعة اللي بتتوضع عالسن، وبهيك منكون رجعنا شكلو التشريحي، وحجمو الطبيعي، ووظيفتو الماضغة.

⭕ طيب، شو هو استطباب هي التيجان، وايمتا بيلجأ الطبيب لهالنوع من التعويضات؟

1️⃣ لاستعادة وظيفة السن المتهدم؛ لأنو النخور الواسعة بتسبب تهدم للسن وبتعرضو للكسر بشكل أكبر، و بتخليه يفقد وظيفتو الماضغة.
2️⃣ لدعم وتغطية الأسنان ذات الحشوات الواسعة.
3️⃣ ببعض الحالات اللي منضطر فيها لقلع سن، فالحل إما الزرع أو عمل جسر.. وبهالحالة التيجان بتكون عالأسنان المجاورة للسن المفقود.. وتعتبر مثبتات لهالجسر.
4️⃣ إستطبابات تجميلية، متل تغطية الأسنان اللي فيها تشوهات شكلية لأسباب وراثية مثلا .. أو بحالة وجود تصبغات شديدة.
5️⃣ للتعويض فوق الزرعات السنية.

⭕ وياترى فينا نستخدم التيجان للأطفال؟

نعم، قد تستطب التيجان الجاهزة مسبقة الصنع (تيجان الستانلس ستيل) لحماية الأسنان اللبنية المنخورة والمتهدمة بشدة عند الأطفال، وهالشي بالحالات يلي بتصير الحشوات عاجزة عن أنها تنقذ السن.

كمان ببعض الحالات في أطفال بيكونوا معرضين للنخور ومع عناية فموية سيئة بشكل أكبر من غيرهم، بسبب المشاكل الذهنية أو الإعاقات الجسدية، أو الأعمار الصغيرة .. بهالحالات منلجأ لتتويج الأسنان لحمايتها من النخر باستخدام تيجان الستانلس ستيل، وخلال فترة التبديل رح تخرج هي التيجان مع أسنان طفلك اللبنية بشكل طبيعي.

⭕ طيب ومنسمع أنو في تيجان دائمة وفي تيجان مؤقتة .. يا ترى شو الفرق؟

1️⃣ التيجان الدائمة، المعدنية بشكل كامل مثل (معدن الذهب، أو الخلائط المعدنية الأخرى مثل الكوبالت، الكروم، النيكل .. والبلاتينيوم)، كمان في تيجان خزفية بالكامل، أو خزف على معدن، أو تيجان راتنجية.
2️⃣ التيجان المؤقتة: تستخدم لحماية الأسنان بين جلسات المعالجة، يعني شغلتها بالمقام الأول أنو تحمي أسنانك من الحساسية والتطاول اللي بصير بعد برد و تحضير هالأسنان استعدادا لاستقبال التاج و أيضا للتعويض عن الناحية التجميلية، ريثما يجهز تعويضك الدائم ويتم تثبيتو من قبل الطبيب … وممكن تكون من الستانلس ستيل، او تيجان الاكريلك..

🚫 بس لازم تنتبه .. أنو هي التيجان المؤقتة هي مجرد إجراء مرحلي.. و ما بتتمتع بالقوة والصلابة يلي بتتميز فيها التيجان الدائمة،لذلك لازم تتجنب المأكولات اللصاقة متل العلكة والسكاكر، والأطعمة القاسية متل الجزر والتفاح، وتفادي المضغ عالجنب الحاوي على هي التعويضات حتى ما تنكسر أو توقع.

هاد كان جزء تعريفي بسيط عن هالنوع من التعويضات .. منتمنى يكون أغنى تساؤولاتكم حول هالموضوع 👌
تبقوا بصحة وخير ❤

● الإعداد، والتحرير، والتدقيق العلمي : د. أريج محمد نجهاني.

● المصدر العلمي : Webmed

🚩 اعـتمادُ ” مِنصَّـةِ صِحـَّةِ الـفَم السوريَّـة – MedDose ”
المتخصِّصةُ بنشر الموثوقِ من طبّ الأسنـان و اختصاصاتهِ ومُحاربةِ المُعتقداتِ الطبيـَّة الخاطئـة.

مواضيع صحة الاسنان والفم