هــاد الــبوست هــوي من مــحض واقــــع مـــشفى الأطــــفال

هــاد الــبوست هــوي من مــحض واقــــع مـــشفى الأطــــفال الجامعي وليس من محض الخيال 💔
تابعوا معنا ..

⛔بتجي لعنا طفلة صغيرة حلوة “مكحلة” بسأل ستا ليش حاطتيلا كحلة ياخالة؟

بتتطلع بفخر وبتقلي
مشان يطلعوا عيونا كبار 😌💣
وإياك تقنعا بغير ذلك اسمع وامتعض بس ..

✅أولاً حجم العين وشكلا متوارث من الأب والأم ، لايوجد جينات بالكحلة بتخلي عين الطفل تكبر كلما كبر .
ثانياً والأهم الكحلة فيها مواد بتسبب تهيج العين وبتعمل التهابات للطفلة ومندخلّا بكتيريا بتأذيلا أنسجة العين ..
وقد يوصل الأمر لأذية الدماغ .

⛔خلينا نبخّر هالولد بلا مايطرقوه عين .

✅أولاً في كتير طرق أسلم من التبخير لحمايك طفلك “النادر الوجود” من العين ،
ثانياً بهي العملية ممكن تسببيله ضرر بالجهاز التنفسي..ممكن يختنق وممكن تعرضيه لحروق.

⛔حسيت ابني ماعم يرتوى من حليبي ف شربته “شوية” عصير سلس .

✅أولاً عصير سلس معدة الكبير مابتتحمله ليتحمله الصغير ،
ثانياً الارتواء من حليبك مو معياره إحساسك وإنما وزن الطفل يلي عم يكسبه ونومته المريحة وبالتالي هوي مرتوي وشبعان ومتغذي .. هي الإضافات الجوهرية قبل ال ٦ شهور بلاها .

⛔جيبيلنا كيلو ملح لنفرك هالصبي بيتعقم وبيطرى جلده .

✅طولي بالك وهدي أعصابك تذكري انه هاد طفل وليس مكدوسة✋،
وبالتالي تمليحه ممكن يعمله تجفاف ويتسببله بحروق والتهابات بالجلد .

⛔في ريحة بشعة كتير عم تهف من البيبي شو حاطتيله؟؟

✅حاطتله سنسال من الثوم لانه بعد كم يوم بس يصفر التوم بكون سحب الصفار من الولد ” اليرقان” ..
التوم لصحن الفول انا بنصح فيه بس لليرقان رجاء جيبوه للطفل عالمشفى ليقرر الطبيب بده مثلا علاج ضوئي او تبديل دم ،
وياما أطفال واصلة عندن المرحلة لليرقان النووي (بالدماغ) بسبب انه التوم ماعطا مفعول وتأخروا عالطفل .

✅لما يوصفلك الطبيب صاد حيوي للطفل او غيره من الأدوية لاتزيدي الجرعة من عندك ظنا منك انه بيطيب أسرع ولا تنقصي من عندك لانه شايفتيه تحسن ، الجرعة حسب العمر والوزن والدوا والحالة، اتركيا للطبيب ولاتلعبي فيا.

⛔إقياء الطفل يعني رزقة جاية للأب .

✅ياما أطفال كل يوم بيستفرغوا وأهلن فقراء ..
الإقياء ماله علاقة بالرزق ابداً،
اله كتير أسباب مرضية بيكتشفا الطبيب ..
والرزق كمان اله كتير أسباب ليس منها إقياء أو إسهال الطفل ..
وبالتالي إقياء الطفل بشكل متكرر يستدعي مراجعة الطبيب ..

بتمنى ماتستغربوا ولا تضحكوا لانه هي القصص صدقا مو نادرة وعم نشوفا كتير للأسف..

خلوا مسؤولية صحة الطفل على الطبيب لا عالجيران ولا عالعادات والتقاليد ، مو عيب أبدا ماتعرفي تتصرفي بأي شكوى بيعاني منها طفلك لأنه صحته مسؤوليتنا نحنا
بس العيب انك تتصرفي وتجربي فيه عن عدم معرفة .

والله يحميلكن أطفالكن الحلوين❤

د. علياء حرب – طبيبة أطفال

مــــيددوز ~ مـــــصدرك للـــــمعلومات الـــــطبية الــــــموثوقة 🛡
(ميددوز)