هوي المكان يلي بتخلق منو الحياة قبل الحمل بكون قد حبة برتق

هوي المكان يلي بتخلق منو الحياة ❤️

قبل الحمل بكون قد حبة برتقال وحتى تمام الحمل بصير قد بطيخة بوزن بيوصل للكيلو ليضم جواتو حوالي ال20 ليتر سوائل وجنين عم يجهز ليعيش !

قبل الحمل بيقعد بالحوض وخلال الحمل ببلش يطلع لفوق ليقعد بالبطن .. ومن شكلو الإجاصي قبل الحمل ليصير دويرة خلال الحمل وبيضوي بنهاياتو !

بيكبر وبيمتد حتى يقدر يضم الجنين والكل بوسعلو !
بيضغط على غيرو ليسبب الألم وعدم الراحة للأم ..

وحتى يتدرب على الولادة بيعمل بروفا بتقلصات اسمها تقلصات براكستون هيكس بتكون غير مؤلمة غير منتظمة ومتقطعة وبتبقى هيي فقط تدريب فلا في تغيير بعنق الرحم ولا في أي شي بهيء لمخاض ..

الرحم الو نوع عضلات بس تتقلص بيقصر طولها وما بترجع بطولها الطبيعي وهالصفة بتخلي عنق الرحم يتوسع ، المشيمة تنفك والجنين يطلع وبعدها النزف يوقف والرحم يرجع لحجمو السابق ..

مو كل الرحم لازم أنو يتقلص !
قطعتو العلوية بس .. السفلية والعنق ثابتين والفضل لتشريح المنطقة
القطعة السفلية قليلة التروية ورقيقة وهيي الوحيدة من الرحم يلي ما لازقة بجوف البطن ولهيك القيصرية مفضلة بهالمنطقة ..

هي بس تغيرات الرحم بالحمل ولسا في كتير شغلات بتتغير حتى تتناسب مع حضور هالروح الجديدة ❤️

معجزة الخلق والخالق !
والحب للأم يلي عم تتحمل وتصبر عالكتير من الآلام والمتاعب حتى تخلق هالروح .. قديه عظيمة حتى الله وكلّها بأصعب وأقسى مهام الحياة ( الأمومة ) !

كنت معكم سَماح صالح محمد ♥️

(سماعة حكيم)