ولدتي يا ماما وقمتي بالسلامة وفتتي هلق بمرحلة النفاس أو با

🤱 ولدتي يا ماما وقمتي بالسلامة وفتتي هلق بمرحلة النفاس أو بالعامية أربعينك ⁦♥️⁩
شو نصايحنا الك لتكوني أنتِ والبيبي بخير ؟

🤱 أول شي لازم تكوني متقبلة مشاعر الألم والتعب والضعف يلي رح تشعري فيهن .. أنتِ أنجبتي روح من صلبك وما في حلاوة ما الها تمن .. خاصةً الولادة القيصرية بيتبعها ألم أكبر وتعب أعظم ما هيي عملية جراحية ومانها سهلة .

🤱 تعالي نخفف نشاطنا ونحصرو بالاهتمام بالبيبي ، نتجنب أي حركة بتأذي البطن وجرح العملية لأنك ولو شفتي الجلد من برا عم يلئم بس العضلات لسا ضعيفة .. لا تطخي كتير ..ارتاحي واتسطحي .

🤱 غالباً باليوم التاني والتالت بعد الولادة صدرك حيتورم ليوم أو يومين .. لتخففي هالتورم حطي كمادة مي دافية عليه قبل الرضاعة ليدر الحليب وبعد الرضاعة حطي كمادة مي باردة ليخف التورم .. ممكن نلجئ لأدوية مع طبيبك .. ولا تنسي تلبسي حمالة الصدر اليوم كلو هي كمان بتساعد .

🤱 بالنسبة للأكل .. شو لازم تاكلي ؟
مهم تشربي سوائل كافية وتلتزمي نظام غذائي متوازن .
كل يوم لازمك 8 ل 10 كاسات سوائل مي ، عصير ، حليب بس نبعد عن كلشي فيه كافئين قد ما منقدر .
خلي أكلك فيه بروتين يعني لحوم .. بيض وجبن .. بروتين نباتي متل زبدة الفول السوداني .. ومنشان الكتام يلي ممكن يصيبك فركزي عالخضرا كتير والفواكه وبالأخير منقلك من كلشي صحي بس بشكل معتدل وسوائل ثم سوائل .

🤱 في دم رح يطلع منك خلال 10 يام ل 3 أسابيع رح يتراوح لونو من الأحمر للبني لمع الوقت يقل حجمو ويخف لونو ويروح .. هاد طبيعي .
فيكي تتحممي ايمت ما بدك بس ما تقربي المهبل وتغسليه قبل ال40 يوم .

🤱 اتصلي بطبيبك لو حسيتي بأي شي مو طبيعي ، تبول مؤلم ، حرارة ، نزف غزير او فيه خثرات كبيرة ، آلام شديدة غير مقبولة ، وذمات ، ضيق نفس ، مشاكل عصبية أو تغيرات غير طبيعية بجرح القيصرية .

رح تبقى في أسئلة براسك يفضل تتوجه لطبيبك المولد يلي حيساعدك أكتر لو كان متعاون .. بيبقى الطب والعلم بتوصياتو أفضل من تجارب الآخرون ⁦♥️⁩

حاولت فيدك بقليل مما تكلم عنه العلم ونشالله تكوني بخير وتخلصي من هالفترة على خير 🙏

كل الحب ⁦♥️⁩

كنت معكم سَماح صالح محمد ♥️

(سماعة حكيم)