⁦⁩ يووه يا ماما أسلحتك ماشالله شو قوية كيف هيك عرفتي أنو

⁦👶🏼⁩ يووه يا ماما أسلحتك ماشالله شو قوية .. كيف هيك عرفتي أنو نقطة ضعفي بس أبكي وعيط هيي سكّارة التم أو اللهاية 🤭 أكيد لساتك قلقانة أنو اللهاية مفيدة ولا ضارة وأنا هون لجاوبك بالعلم على سؤالك فاسمعيني ⁦❤️⁩

⁦👶🏼⁩ خلينا نبلش بالفوائد 😌
أنا من وقت بخلق برحمك بمص إصبعتي فهالشغلة بتجي بالفطرة وهدف هالحركة تهديني وتحسسني بالأمان وتلهيلي دماغي .. بعد ما اجي عالدني بكون كلشي جديد عليي ومخيف عداكي أنتِ وبابا لهيك وقت تحطيلي اللهاية بهدا وبرتاح وبخف ألمي لو كنت ممغوص أو مرضان 🥺

⁦👶🏼⁩ اللهاية لو حطيتيلي ياها ببداية نومي بتخليني نام فترة أطول وبعمق أكبر .. وكمان هيي بتحميني من متلازمة موت الرضيع المفاجئ لأنها وحسب العلم يا ماما بتمنعني اتدحرج على بطني واختنق ولو كنتي غلطانة وحاطة شي بطانية او مخدة فكمان بتحميني طب عليهن واختنق فيهن لا سمح الله ..

بقولوا أنها بتمنع ارتجاع المريء وبتقوي عضلات التنفس وهاد كلو بيحميني من أني أتشردق أو أختنق بس نام ⁦👌🏻⁩

⁦👶🏼⁩ أهم فائدة للهاية ما فيني أتغاضى عنها أنها بتسكتني وقت اللزوم 😂⁦🤦🏻‍♀️⁩ بالضجة وبالنكد وبعياطي يلي بدون سبب .. سبحان الله كيف أنها متل جهاز التلفزيون فجأة بتخفض الصوت وبتطفيه كمان 🙄

⁦👶🏼⁩ أما عن مساوئها فمختلف عليها كتير بين أنها بتعمل فطام باكر عن الرضاعة الطبيعية وبين أنها تعتبر تجمع للبكتريا وبتعمل التهاب أذن وسطى وأهم ضرر هوي سوء إطباق الأسنان وحتى ما نختلف رح أعطيكي توصيات أعلى جهة علمية الأكاديمية الأمريكية لطب الأطفال :

من أول ما بخلق ولعمر الشهر يا ماما منخاف شوي أنو نعطي اللهاية فحضرتي قلل مروة واستسهل مص اللهاية عن مص الثدي أو أتعب بمص اللهاية فما يعود الي طاقة مص الثدي لهيك يفضل ما تنعطى لبيبي تنبل جدوب مو عرفان يرضع وهكلان هم يرضع .. منطول بالنا شهر وبعدين مندخلها ⁦❤️⁩ بس إذا كانت رضاعتي منيحة وما مأثرة فعادي ..

هلق حتى عمر ال6 شهور ما في خوف من قصة انها تعمل التهاب أذن وسطى بس بعد نص سنة اي منقلق شوي فممكن اذا منقدر نتخلى عنها فبلاها أو نخفف منها ..

منشان سوء إطباق الأسنان فهالمشكلة ممكن تظهر بعد سنتين وأكيد بتظهر بعد 4 سنين لهيك التوصية الأكيدة ما ناخد لهاية لعمر ال4 سنين وأنا برأيي إذا بهمك رأيي يعني مو معقول صير شب وهاللهاية بتمي والله عيب 🙂

المهم التوصية الأخيرة منقدر نعطي لهاية لسنة مو أكتر .

⁦👶🏼⁩ في ولاد منا ما بحبوها عادي ما تجبرونا ماما لأنو القصة اختيارية .. أساساً نحنا منجبركن مو أنتوا والله 😂💔
اذا قمتي بالليل لاقيتيني بازقها تركيني لا ترجعي تحطيها بس اذا شفتيني متعلق فيها ومدمن عليها ولو وقعت شوي جعيري بعبي الحارة فهون بقلك الله يعينك عندك معركة فطام عنها مو هينة 😢

ومنشان الفطام عنها متل الفطام عن الرضاعة بالتدريج شوي شوي بتنسيني ياها وبتلهيني بشي تاني عنها .. قول ما بينخاف عليكِ ماما حنونة وقوية وبتعرف دوايي والأهم بتعرفني حتى أكتر من حالي 🥰

بحبك روح قلبي يا ماما ♥️

كنت معكم سَماح صالح محمد ♥️

لهاية طفل

(سماعة حكيم)