النهاردة يا سيدي أبل تنزل كذا منتج جديد ضمن الـLine-ups بتاعتها، وده يعتبر شهر Apple، وعامةً أي حاجة جامدة هتلاقيها بتيجي في شهر تسعة، السلطان عبدالحميد التاني اتولد في شهر 9، أبل بتنزل موبايلاتها في شهر 9، والجينيص اتولد في شهر 9!
بس سيبك من ده دلوقتي، خليني أكلمك عن الـiPhone 13، بحكم إنه هيبقى الأكثر مبيعًا من Apple الفترة اللي جاية، زي أسلافه من ساعة الـiPhone 11 والـiPhone Xr!
الحقيقة Apple مش شركة جامدة وبتستنى التقنية لحد ما تنضج وتستخدمها، ولكن هي مش بتحط أي تقنية بدون ما تحلبها لأخر قطرة، عاوز تفهمني أكتر؟ خليني أشرحلك
دلوقتي سلسلة iPhone 13 الجديدة بتيجي بخاصية ProMotion، ايه الخاصية دي؟ بالظبط شاشة بمعدل تحديث Dynamic بيوصل لـ120Hz!
هتنبسط؟ لأ اصبر، في موبايلات في سعر الـ200$ داعمة للـ120Hz، وبقالها سنتين بتنزل السوق والناس بتشتريها، لدرجة انها بقت من الـStandards اللي بنحكم بيها على الموبايل، ولكن لحد الجيل اللي فات أبل مستخدمتش شاشات بتردد عالي، وتؤتؤ مش عشان التقنية مش ناضجة، عشان أبل عاوزة تحلب التقنية دي لأخر نقطة
ببساطة هي قاست مدى نجاحها، مخدتش Risk تكلفتها في الأول وتشوف هل الناس هترحب بالفكرة ولا لأ، التكنولوجيا ناجحة بالفعل ومش محتاجة نقاش في النقطة دي
بس المشكلة ساعتها ان Apple هتضطر تزود حجم البطارية لأن استهلاك الشاشة هيبقى عالي، وتزويد حجم البطارية معناها زيادة في سمك الجهاز وتغيير في الهندسة الداخلية للموبايل اللي بقالهم سنين شغالين عليها، مش منطقي أهدم كل ده في مقابل ميزة!
طب والحل؟ طور شاشات LTPO واستخدمها، وببساطة دي بتقدر تتحكم في معدل تحديث الشاشة وتقلله لأرقام بتوصل لـ1fps! بحيث استهلاك البطارية يكون Adaptive ومتناسق مع المحتوى المعروض على الشاشة، ده أدى لإيه؟ بدل ما Apple كانت محتاجة تزود حجم البطارية، هي كسبت وقت اضافي للبطارية بدون مجهود يذكر على البطارية ذات نفسها!
عاوز تعرف بقى ايه أخر قطرة حلبتها Apple؟ ببساطة دعم المطورين للميزة دي، التكنولوجيا بقت متاحة للناس وفي نفس الوقت التطبيقات بالفعل بتقدر تستفيد بيها من أول ساعات استخدام المستهلك للموبايل، فـ يحس بالفرق فعلًا بين أداء الجيل اللي فات والجيل الجديد.
مش بقولك ان Apple ذكية جدًا وهي أذكى شركة في الوجود، ولكن Apple من ناحية الـ Business عملاق حقيقي، يقدر يحقق لنفسه أكبر استفادة وفي المقابل يحصل على أعلى نسبة رضا ممكنة من العميل.
وبس كدة، ده كان كل اللي حابب أقوله عن عائلة الـiPhone 13، ممكن يبقى لينا بوست عن الـiPad قريب فـ اتأكد انك متابعني واعمل لايك للبوست ده، وبس كدة، ده الموضوع ببساطة.
الجينيص
الجينيص